किती किती लाड केले तुझे

मीच नाही, सर्वांनी ही

लाल काय,पांढरी आणि 

निळी ही फुले

दुर्वा, बेल, तुळस

काही बाकी ठेवले नाही

ते ही रोजच्या रोज 

आज काय संकष्टी, नाहीतर

वेगवेगळे वार आहेतच

श्रावण, मार्गशीर्ष, माघ

रूपे तुझी वेगवेगळी

सर्वांना मानून श्रध्देने

उपास तपास पूजा

होम हवन, नवस

आणि काय काय ! 

काही पोचतच नाही का हे

श्रद्धा, भाव, भक्ती तुझ्यापर्यंत 

नुसताच प्रेक्षक होऊन बसला आहेस

शस्त्रे काही वापरतो आहेस का नाही

पाप्याना धडा शिकवायला

कष्टाळू भक्तांना न्याय द्यायला

सर्वत्र सुख शांती नांदायला

निरामय निरोगी आयुष्य जगायला 

गंजू देऊ नको तुझी आयुधे

अजूनही मानतो आम्ही तुला

सुखकर्ता दुःख हर्ता

प्रत्यक्षात उतरू देत तुझी रूपे 

विश्वास आमचा दृढ व्हायला 

    अलका काटदरे /३०.१२. २१